thane – मुंब्र्यात एका सहाय्यक पोलीस उपनिरीक्षकाला २५ हजारांची लाच घेताना लाचलुचपत प्रतिबंधक विभागाने (ठाणे) रंगेहात पकडले. शशिकांत लक्ष्मण भालेराव असे या सहाय्यक पोलीस उपनिरीक्षकाचे नाव असून, ते मुंब्रा पोलीस ठाण्यात कार्यरत आहेत. मुंब्रा पोलीस ठाण्यात दाखल असलेल्या गुन्ह्यात मदत करतो असे सांगून २५ हजारांची लाच घेतल्याप्रकरणी रंगेहात पकडले.
मिळालेल्या माहितीनुसार, मुंब्रा पोलीस ठाण्यात तक्रारदार यांच्याविरोधात गुन्हा दाखल आहे. या गुन्ह्यात मदत करतो असे सांगून सहायक पोलीस उपनिरीक्षक भालेराव यांनी त्याच्याकडे ५० हजारांची लाच मागितली होती. तडजोडीनंतर ही मागणी २५ हजार रुपयांवर ठरली. याबाबत तक्रारदार यांनी ठाणे लाचलुचपत प्रतिबंधक विभागाकडे तक्रार दाखल केली होती.
ठाणे लाचलुचपत प्रतिबंधक विभागाने पडताळणी केली असता, भालेराव यांनी मागणी केली असल्याचे निष्पन्न झाले. त्यानतंर सापळा कारवाईत मुंब्रा पोलीस ठाण्यामधील रायटर कक्षामध्ये तक्रारदाराकडून २५,००० रुपये घेताना भालेराव यांना एसीबीने रंगेहात पकडले. दरम्यान, याप्रकरणी भालेराव यांच्यावर गुन्हा दाखल करण्यात आला असून, त्यांना अटक करण्यात आली आहे.
