पुणे – श्रीमंत दगडूशेठ गणपती देवस्थानला ‘क’वर्ग पर्यटनस्थळाचा दर्जा देण्यास झालेल्या जिल्हा नियोजन समितीच्या बैठकीत मान्यता देण्यात आली असल्याची माहिती पालकमंत्री चंद्रकांत पाटील यांनी ट्विटरच्या माध्यमातून दिली. त्याबरोबरच संपूर्ण जिल्ह्यात राज्य शासनाची ‘गाळमुक्त धरण व गाळयुक्त शिवार’ योजना प्रभावीपणे राबविण्याचा, चिंचवड येथील मोरया गोसावी देवस्थान परिसराच्या विकासासाठी निधी उपलब्ध करून देण्याचा निर्णय बैठकीत घेण्यात आला.
पुणे जिल्हा नियोजन समितीची माझ्या अध्यक्षतेखाली बैठक झाली. या बैठकीत दगडूशेठ गणपती देवस्थानला ‘क’ वर्ग पर्यटनस्थळाचा दर्जा देण्यास मान्यता दिली. तसेच मोरया गोसावी देवस्थान परिसर विकासासाठी निधी देण्याच्या सूचना अधिकाऱ्यांना दिल्या. त्यासोबतच राज्य शासनाची ‘गाळमुक्त धरण व गाळयुक्त शिवार’ योजनेची संपूर्ण जिल्ह्यात प्रभावीपणे राबवावी; यासाठी प्रत्येक तालुक्यात किमान 10 ठिकाणचा गाळ काढण्याच्या सूचना अधिकाऱ्यांना दिल्या.
याशिवाय जिल्हा परिषद शाळा, रस्ते आणि अंगणवाड्यांचा विकास, पुणे शहरात नव्याने समाविष्ट झालेली गावांसाठी सुविधा, पोलिस दलाचे अद्ययावतीकरण करणे, दौंड, इंदापूर आणि बारामती तालुक्यातील शेतकऱ्यांना पुरेशी वीज मिळावी आदी विषयांवर सविस्तर चर्चा झाली. ‘गाळमुक्त धरण व गाळयुक्त शिवार’ योजनेच्या माध्यमातून
या बैठकीला ज्येष्ठ नेते खासदार शरद पवार, राज्याचे विधानसभेचे विरोधी पक्षनेते अजित पवार, खासदार सुप्रिया सुळे, श्रीरंग बारणे, डॉ. अमोल कोल्हे, यांच्या सह जिल्ह्यातील आमदार, विभागीय आयुक्त सौरभ राव, जिल्हाधिकारी डॉ.राजेश देशमुख, जिल्हा नियोजन अधिकारी किरण इंदलकर आदी उपस्थित होते. असे चंद्रकांत पाटील यांनी आपल्या ट्विटमध्ये म्हंटले आहे.
