विरार – विरार रेल्वे स्टेशनवर एका पतीने आपल्या पत्नीवर जीवघेणा हल्ला केला असल्याची माहिती समोर आली आहे. शिव शर्मा आणि वीरशिला शर्मा असे या पती-पत्नीचे नाव असून, दोघांमधील कौटुंबिक वादातून हा प्रकार घडल्याचे सांगण्यात येत आहे.याप्रकरणी पोलिसांनी आरोपी पतीला अटक केली आहे.
मिळालेल्या माहितीनुसार, वीरशिला शर्मा ही कामावर जात असताना शिव शर्माने विरार रेल्वे स्थानकातील फलाट क्रमांक एकला लागून असलेल्या पादचारी पुलावर तिच्यावर चाकूने वार केले. त्यानंतर ओढणीने तिचा गळा आवळण्याचाही प्रयत्न केला. परंतु, वीरशिला हिने चाकूचे पाते हाताने धरुन ठेवले. यामुळे तिचा जीव थोडक्यात वाचला. मात्र, चाकू हल्ला रोखताना तिच्या दोन्ही हातांना गंभीर दुखापत झाली आहे. तिच्या गळ्यावरही चाकूचा एक वार झाला आहे. वीरशिला शर्मा हिच्यावर सध्या रुग्णालयात उपचार सुरु आहेत.
दरम्यान, या घटनेनंतर पोलिसांनी तिचा पती शिव शर्माला अटक केली आहे.
