mumbai – एका वरिष्ठ पोलीस निरीक्षकाला १ लाख रुपयांची लाच घेताना मुंबई लाचलुचपत प्रतिबंधक विभागाने रंगेहाथ पकडले असल्याची माहिती समोर आली आहे. बाबुराव देशमुख असे वरिष्ठ पोलीस निरीक्षकाचे नाव असून, ते गोवंडी परिसरातील शिवाजीनगर पोलीस ठाण्यात कार्यरत आहेत.
मिळालेल्या माहितीनुसार, काही इसमांनी एका ट्रस्टच्या शाळेच्या गेटचे कुलूप तोडून शाळेच्या कार्यालयामध्ये जबरदस्ती प्रवेश केला आणि ट्रस्टवर ताबा मिळवण्याचा प्रयत्न केला. या प्रकरणी तक्रारदाराने शिवाजीनगर पोलीस ठाण्यात तक्रार केली होती. या प्रकरणातील आरोपींवर गुन्हा दाखल करण्यासाठी वरिष्ठ पोलीस निरीक्षक बाबुराव देशमुख यांनी तक्रारदाराकडे 5 लाख रुपयांची मागणी केली.
तक्रारदाराने विनवणी केल्यानंतर देशमुख यांनी कमीत कमी 3 लाख रुपये द्यावे लागतील, तर गुन्हा दाखल करू असे सांगितले. मात्र तक्रारदाराची लाच देण्याची इच्छा नसल्याने त्यांनी एसीबीकडे तक्रार केली. तक्रारीची पडताळणी केल्यानंतर देशमुख यांनी तडजोडीअंती अडीच लाख रुपये स्वीकारण्याचे कबूल केल्याचे निष्पन्न झाले. त्यानुषंगाने एसीबीने सापळा रचत देशमुख यांना लाचेचा पहिला हप्ता 1 लाख रुपये घेताना रंगेहाथ पकडले.
दरम्यान, याप्रकरणी देशमुख यांच्यावर गुन्हा दाखल करण्यात आला असून, पुढील तपास सुरू आहे.
