palghar – गवत खरेदी करण्यासाठी ना हरकत दाखला देण्याकरीता लाचेची मागणी करण्यात आल्याची माहिती समोर आली आहे. याप्रकरणी १० हजार रुपयांची लाच स्वीकारल्या प्रकरणी ठाणे लाच लुचपत विभागाने कारवाई केली आहे. डहाणू तालुक्यातील सायवान ग्रामपंचायतीचे सरपंच, ग्रामसेविका आणि कंत्राटी लिपिक यांच्या विरोधात कासा पोलीस ठाण्यात गुन्हा नोंद करण्याची प्रक्रिया सुरु आहे. आरोपी सरपंच व कंत्राटी लिपिक यांना ताब्यात घेण्यात आले आहे तर ग्रामसेविका यांची चौकशी करून नोटीस देऊन सोडण्यात आले आहे.
मिळालेल्या माहितीनुसार, डहाणू तालुक्यातील सायवान ग्रामपंचायत हद्दीत तक्रारदार हे स्थानिक लोकांकडून गवत खरेदी करून डहाणू परिसरातील तबेला, गोठे व इतर पेपर कंपन्यांना पुरवठा करतात. त्यांनी ओले आणि सुके गवत खरेदी करिता ना हरकत दाखला मिळावा यासाठी यांनी सायवन ग्रामपंचायत मध्ये रीतसर अर्ज दिला होता. मात्र ग्रामसभेचे ना हरकत प्रमाणपत्र देण्यासाठी ग्रामसेविका ममता पिंपळे आणि सरपंच विष्णू बोरसा हे तक्रारदार यांच्याकडे १५ हजार रुपयांची मागणी करीत असल्याबाबत तक्रारदार यांनी लाचलुचपत प्रतिबंधक विभाग ठाणे कार्यालय येथे तक्रार दिली होती.
तक्रारीच्या अनुषंगाने ग्रामसेविका आणि सरपंच यांनी केलेल्या पडताळणी कारवाई मध्ये दहा हजार रुपये रकमेची लाच मागणी करत असल्याबाबतचे निष्पन्न झाले. यानंतर लाचलुचपत विभागाने सापळा रचून ग्रामसेविका व सरपंच यांच्या सांगण्यावरून कंत्राटी लिपिक यशवंत भोये याला १० हजार रुपये स्वीकारताना पकडण्यात आले. याप्रकरणी ग्रामसेविका ममता पिंपळे, सरपंच विष्णू बोरसा आणि कंत्राटी लिपिक यशवंत भोये यांच्यावर कासा पोलीस ठाण्यात गुन्हा दाखल करण्याची प्रक्रिया सुरू असून ग्रामसेविका ममता पिंपळे यांना नोटीस देऊन सोडून देण्यात आले आहे.
