ठाणे – आपला आणि आपल्या मित्राचा वाढदिवस एकाच दिवशी असल्याने तो साजरा करण्यासाठी एका अल्पवयीन मुलीने स्वतःच्या घरी चोरी केली त्यानंतर हे प्रकरण उघड पडू नये यासाठी या मुलीने तिच्या अल्पवयीन मित्राने अश्लिल फोटो काढले असून, ते व्हायरल करण्याची धमकी देऊन तो तिच्याकडे पैशाची मागणी करत असल्याने तिने स्वतः च्या घरातील सोने चोरी करून त्यास दिले असल्याचा बनाव केला असल्याचा प्रकार उघडकीस आला आहे. सदर प्रकरणी कापूरबावडी पोलिसांनी या दोघांनाही अटक केली आहे.
याबाबत वृत्त असे आहे कि, फिर्यादी यांच्या अल्पवयीन मुलीने तिचे तिच्या मित्राने अश्लिल फोटो काढले असून, ते व्हायरल करण्याची धमकी देऊन, तो तिच्याकडे पैशाची मागणी करत असल्याचे सांगितले तसेच त्याकरीता तिने घरातील सोने चोरी करून त्यास दिले असल्याची माहिती सांगितली. त्यावरून सदरचा प्रकार हा गंभीर स्वरूपाचा असल्याने, पोलीसांनी तात्काळ सदर घटनेची तत्परतेने दखल घेऊन, तिने दिलेल्या माहिती वरून तिला ब्लॅकमेल करणा-या तिच्या मित्रास आझाद नगर परिसरातून ताब्यात घेतले असता, तो सुद्धा अल्पवयीन असल्याचे समजले. पोलिसांनी त्याच्याकडे चौकशी केली असता सदर प्रकाराची कबुली दिली व सदरचे सोन्याचे दागिने हे ज्वेलर्सकडे विक्री केले असल्याचे सांगितले.पोलीस त्या अल्पवयीन मुलाला घेऊन सराफाच्या दुकानात गेले असता, सराफाने हा मुलगा दुकानातच आला नसल्याचे सांगितले. त्यानंतर पोलिसांनी दुकानातील सीसीटीव्ही तपासले असता तो मुलगा त्या दुकानात आला नसल्याचे स्पष्ट झाले. त्यामुळे हा मुलगा बनाव करत असल्याचे स्पष्ट झाले.
त्यानंतर पोलिसांनी सदर अल्पवयीन मुलीकडे पुन्हा चौकशी केली असता तिने यापूर्वी दिलेली माहिती ही तिच्या मित्राला वाचविण्याकरीता दिली असल्याचे सांगितले तसेच तिचा व मित्राचा वाढदिवस एकाच दिवशी असल्याने तो त्यांना एकत्र साजरा करावयाचा होता परंतु त्याकरीता पैशाची आवश्यकता असल्याने घरातील सोन्याचे दागिने चोरी केले असल्याचे सदर मुलीने सांगितले. त्यावरून पोलिसांनी सदर मित्राकडे चौकशी केली असता त्याने सदरबाबत कबुली देऊन चोरी केलेले दागिने हे त्याच्या ओळखीचा गणेश नगर मानपाडा परिसरातील गौरी ज्वेलर्स बासुकी सुरेंद्र वर्मा यास ५३,००० /- रूपयांना विक्री केले असल्याचे सांगितले.
सदर प्रकरणी पोलिसांनी अटक केली असून, दुकानदार बासुकी सुरेंद्र वर्मा यास चोरीचे दागिने आहेत असे माहिती असताना सुद्धा ते विकत घेतले याकरीता त्यालाही अटक केली. तसेच त्याच्याकडून गुन्हयातील चोरीस गेलेले दागिने जप्त केले. आणि फिर्यादी यांची मुलगी विधीसंघर्षग्रस्त बालिका म्हणून ताब्यात घेऊन बाल न्यायालयाकडे पाठविण्याची तजवीज ठेवण्यात आलेली आहे.
