कल्याण – चैन स्नॅचिंग, जबरी चोरी, वाहन चोरी करणाऱ्या इराणी चोरट्याला खडकपाडा पोलिसांनी अटक केली. अपेदारा आफ्रिदी असे याचे नाव आहे. आफ्रिदी यानेच काही दिवसांपूर्वी चोरट्याला अटक करण्यास गेलेल्या मुंबई पोलिसांवर दगडफेक केली होती.
मिळालेल्या माहितीनुसार ठाणे जिल्ह्यासह राज्यात आणि देशभरात चोरी करणाऱ्या आफ्रिदीचा शोध पोलीस घेत होते. मात्र अनेक वर्षापासून तो पोलिसांच्या हाती लागत नव्हता. काही दिवसांपूर्वी मुंबई पोलिसांचे पथक कल्याण जवळ आंबिवली येथील इराणी वस्तीत एका इराणी चोरट्याला अटक करून घेऊन जात असताना आफ्रिदीनेच पोलिसांवर दगडफेक केली होती.
पोलीस आफ्रिदीचा शोध घेत होते. त्यावेळी आफ्रिदी कल्याण जवळील आंबिवलीच्या इराणी वस्तीतील मंगलनगर येथे राहत असल्याची माहिती खडकपाडा पोलिसांना मिळाली.मिळालेल्या माहितीच्या आधारावर आंबिवली इराणी वस्तीत सापळा रचून पोलिसांनी याला अटक केली.
दरम्यान, आफ्रिदी विरोधात देशभरात ३० गुन्हे दाखल असल्याची माहिती समोर आली आहे.
