dombivali – डोंबिवली पश्चिमेतील एका १२ वर्षीय मुलाने प्रामाणिकपणा दाखवत हरवलेला I phone 13 विष्णू नगर पोलिसांकडे जमा केला. सोहम परदेशी या मुलाचे नाव असून, त्याच्या या प्रामणिकपणाचे पोलिसांकडून कौतुक होत आहे.
मिळालेल्या माहितीनुसार, सोहम परदेशी डोंबिवलीतील गुप्ते रोड परिसरात मित्रांसोबत खेळत असताना, खेळाचा चेंडू झाडाजवळ गेल्यामुळे तो उचलायला गेला असता, त्याला अंदाजे १ लाख रुपये किंमतीचा I phone 13 सापडला. सोहमने याबाबत आपल्या वडिलांना सांगितले. त्यानंतर त्याचे वडील नरेश परदेशी यांनी विष्णू नगर पोलीस ठाण्यातील गुन्हे शाखेचे पोलीस निरीक्षक गहिनीनाथ गमे यांच्याकडे तो फोन स्वाधीन केला.
दरम्यान, सोहमच्या प्रामाणिकपणाबद्दल पोलिसांनी कौतुक करत त्याचा गौरव केला.
तसेच सदर I phone 13 पोलीस स्टेशनमध्ये जमा करण्यात आला असून, ज्याचा हा मोबाईल आहे त्याने आपली ओळख व मोबाईलची कागदपत्रे घेऊन पोलिसांशी संपर्क साधावा असे आवाहन पोलीस निरीक्षक गहिनीनाथ गमे यांनी केले आहे.
