mumbai – बदलापूर येथील अक्षय शिंदे एन्काऊंटर प्रकरणी मुंबई उच्च न्यायालयाने ५ पोलिसांविरुद्ध गुन्हा दाखल करण्याचे आदेश सरकारला दिले आहेत. न्यायालयाने संबंधित पोलिसांना निलंबित करण्याचेही आदेशही दिले आहेत. अक्षय शिंदे एन्काउंटर प्रकरणी आज उच्च न्यायालयात सुनावणी झाली. त्यावेळी हे आदेश देण्यात आले. तसेच एक विशेष पथक गठीत करुन प्रकरणाची चौकशी करण्याचे निर्देश दिले आहेत. मुंबई गुन्हे शाखेचे सह पोलीस आयुक्त लखमी गौतम यांच्या देखरेखीखाली ही समिती स्थापन करण्यास सांगण्यात आले आहे.
याप्रकरणी अक्षय शिंदेचे वडील अण्णा शिंदे यांनी पोलिसांवर आरोप करत याचिका दाखल केली होती. आपल्या मुलाचा एन्काउंटर बनावट असून त्याला कट रचून मारण्यात आल्याचे त्यांनी याचिकेत म्हटले होते. त्यावर न्यायालयात मागील काही महिन्यांपासून सुनावणी सुरू होती. या दरम्यान अक्षय शिंदेच्या आई-वडिलांनी आपल्या हा खटला पुढे नेण्यास रस नसल्याचे सांगितले. आपले वय झाले असून धावपळ करणे जमत नसल्याचे त्यांनी न्यायालयाला सांगितले. त्यानंतर न्यायालयाने स्युमोटो पद्धतीने या याचिकेवर सुनावणी सुरू ठेवली. अखेर न्यायालयाने राज्य सरकारला संबंधित पोलीस अधिकाऱ्यांना निलंबित करण्याचे आदेश दिले.
न्यायालयाच्या या आदेशानंतर आता अक्षय शिंदे एन्काऊंटर प्रकरणाचा तपास मुंबईचे गुन्हे शाखेचे सहपोलीस आयुक्त लखमी गौतम यांच्या नेतृत्वात विशेष तपास पथक स्थापन केले जाणार आहे. हे तपास पथक अक्षयच्या एन्काऊंटरचा तपास करेल. अक्षय शिंदे एनकाउंटर प्रकरणाचा तपास आता सीआयडीकडून विशेष तपास पथकाकडे सोपवण्यात आला आहे. मुंबई गुन्हे शाखेचे सहपोलीस आयुक्त लखमी गौतम यांच्या नेतृत्वात एसआयटी बनवण्याचा आदेश हायकोर्टाने दिला आहे. एसआयटीमध्ये अधिकारी निवडण्याचे अधिकारही सहपोलीस आयुक्तांना देण्यात आले आहेत. सीआयडीला दोन दिवसात या प्रकरणाचे सर्व कागदपत्र एसआयटीला देण्याच्या सूचना न्यायालयाने दिल्या आहेत.
दरम्यान, राज्य सरकारने या निर्णयाला दोन आठवड्यांची स्थगिती देण्याची मागणी केली होती. मात्र उच्च न्यायालयाने ही मागणी फेटाळली आहे.
