ठाणे – मामाकडून १ कोटी रूपयांची खंडणी घेणाऱ्या भाच्याला खंडणी विरोधी पथकाने अटक केली आहे. मंगेश थोरात असे या भाच्याचे नाव आहे.
मिळालेल्या माहितीनुसार, मंगेशची मामी जयश्री तुपे हिने मंगेशला व्यवसाय करण्यासाठी ६१ लाख रूपये हातऊसने दिले होते. तसेच तिने पुनीत कुमार या व्यक्तीकडे व्यवसायानिमित्ताने १ कोटी २५ लाख रूपये गुंतविले होते. त्यासंदर्भात करारनामा केलेला होता. परंतु पुनीत कुमार हा त्यांना पैसे परत देत नव्हता. त्यामुळे त्यांनी सदरचे पैसे काढून देण्यासाठी मंगेशला सदरचा करारनामा देऊन काही रक्कम दिली होती.
परंतु मंगेशने दिलेल्या करारनामाचा फायदा घेऊन आपल्या मामा सुभाष तुपे आणि मामी जयश्री तुपे यांना अँटी करप्शन ब्युरोमध्ये तक्रार करेन तसेच बदनामी करून जिवे ठार मारण्याची धमकी दिली आणि हातऊसने दिलेले पैसे परत मागू नये म्हणून १ कोटी रूपयांची खंडणी मागितली असल्याची तक्रार मामा सुभाष तुपे यांनी खंडणी विरोधी पथकाकडे केली होती.
त्याअनुषंगाने पोलिसांनी खारघर टोलनाका नवी मुंबई येथे सापळा रचून मंगेशला १ कोटी रूपये खंडणीची रक्कम स्विकारताना ताब्यात घेतले तसेच नौपाडा पोलीस ठाण्यात गुन्हा दाखल करून त्यास अटक केली.
सदरची कारवाई आशुतोष डुंबरे, पोलीस आयुक्त, ठाणे शहर, डॉ. ज्ञानेश्वर चव्हाण, पोलीस सह आयुक्त, ठाणे शहर.डॉ. पंजाबराव उगले, अपर पोलीस आयुक्त, (गुन्हे), ठाणे शहर शिवराज पाटील, पोलीस उप आयुक्त, (गुन्हे), ठाणे, राजकुमार डोंगरे, सहायक पोलीस आयुक्त, शोध – २, गुन्हे शाखा, ठाणे यांच्या मार्गदर्शनाखाली शेखर बागडे, वरिष्ठ पोलीस निरीक्षक, खंडणी विरोधी पथक, ठाणे, मपोनि वनिता पाटील, सपोनि भुषण कापडनिस, सपोनि सुनिल तारमळे, पोउपनि विजयकुमार राठोड, सपोउनि सुभाष तावडे, सपोउपनि कल्याण ढोकणे, पोहवा संजय राठोड, पोहवा सचिन शिंपी, पोहवा गणेश गुरसाळी, पोहवा संदीप भोसले, पोहवा योगीराज कानडे, मपोहवा शितल पावसकर, चापोना भगवान हिवरे, पोशि तानाजी पाटील, पोशि अरविंद शेजवळ, मपोशि मयुरी भोसले यांनी केली.
