मुंबई – काँग्रेसने माजी आमदार आशिष देशमुख यांना पक्षातून ६ वर्षांसाठी निलंबित केले आहे. पक्ष विरोधी वर्तन आणि जाहीर वक्तव्य केल्याप्रकरणी पक्षाच्या शिस्तपालन समितीने आशिष देशमुख यांना पक्षातून ६ वर्षांसाठी निलंबित केले आहे. शिस्तपालन समितीचे अध्यक्ष पृथ्वीराज चव्हाण यांनी याबाबत आदेश दिले आहेत. याप्रकरणी शिस्तपालन समितीचे एक पत्र प्रसिद्ध झाले आहे.
महाराष्ट्र प्रदेश काँग्रेस कमिटीच्या शिस्तपालन समितीने ५ मार्च २०२३ रोजीच्या पाठविलेल्या कारणे दाखवा नोटीसला ९ एप्रिल २०२३ रोजीच्या आपल्यामार्फत मिळालेल्या उत्तरावर समितीने चर्चा केली आहे. आपण आपल्या पक्षविरोधी वर्तनाबद्दल आणि जाहीर वक्तव्याबद्दल दिलेले उत्तर समितीला समाधानकारक वाटत नाही. त्यामुळे भारतीय राष्ट्रीय काँग्रेस पक्षाच्या घटनेतील शिस्तपालन नियम आणि मार्गदर्शक तत्वे या प्रकरणात लागू होतात.
आपण केलेल्या पक्षविरोधी वक्तव्याची दखल घेऊन महाराष्ट्र प्रदेश काँग्रेस कमिटीच्या शिस्तपालन समितीने तुम्हाला भारतीय राष्ट्रीय काँग्रेस पक्षाच्या प्राथमिक सदस्यत्वातून सहा वर्षांच्या कालावधीसाठी निष्कासन करण्याचा निर्णय घेतला आहे, असे शिस्तपालन समितीच्या पत्रात लिहीले आहे.
