मुंबई – खार येथे एका परदेशी महिला यूट्यूबरचा विनयभंग केल्याचा धक्कादायक प्रकार घडला. ही तरुणी व्हिडीओ शूट करत असताना स्थानिक तरुणांनी तिची छेड काढली. संबंधित तरुणी ही दक्षिण कोरियाची नागरिक आहे. या घटनेचा व्हिडीओ व्हायरल झाला आहे. खार पोलिसांनी या प्रकरणी गुन्हा दाखल करत सदर तरुणांना अटक केली. मोबीन शेख आणि मोहम्मद अन्सारी अशी अटक करण्यात आलेल्यांची नावे आहेत.
याबाबत वृत्त असे आहे कि, तरुणी खार रेल्वे स्थानकाजवळील रोड नंबर पाचवर लाईव्हस्ट्रीमिंग करत होती. यावेळी तिथे दोन तरुणांनी तिचा हात पडकून खेचण्याचा, जबरदस्ती करण्याचा आणि चुंबन घेण्याचाही प्रयत्न केला. मात्र या तरुणीने त्यांना दूर केलं. ही तरुणी घटनास्थळावरुन दूर जाऊ लागल्यानंतर तोच तरुण आपल्या एका मित्रासह बाईकवरुन पुन्हा तिच्या दिशेने आला आणि तिला जिथे जायचं आहे सोडण्याची ऑफर दिली. मात्र तिने त्याची ऑफर नाकारली, असं या व्हिडीओमध्ये दिसत आहे.
