mumbai – अ‍ॅड. असिम सरोदे यांची वकिलीची सनद तीन महिन्यांसाठी रद्द करण्यात आली आहे. महाराष्ट्र आणि गोवा बार कौन्सिलने हा निर्णय घेतला. अ‍ॅडव्होकेट विवेकानंद घाटगे यांच्या अध्यक्षतेखालील समितीने हे निर्देश दिले आहेत. असीम सरोदे यांनी एका सार्वजनिक कार्यक्रमात न्यायव्यवस्था, राज्यपाल आणि विधानसभा अध्यक्ष यांच्यासंदर्भात आक्षेपार्ह वक्तव्य केले होते. त्यामुळे असीम सरोदे यांच्यावर ही कारवाई करण्यात आली.
एका तक्रारदाराने असिम सरोदे यांच्याबाबत बार कौन्सिलकडे तक्रार केली होती. तक्रारदाराने बार काऊन्सिलकडे दाखल केलेल्या तक्रारीत म्हटले आहे की, अ‍ॅड. सरोदे यांच्या वक्तव्यांमुळे न्यायव्यवस्थेचा अपमान झाला असून, सामान्य जनतेच्या मनात न्यायालयांविषयी अविश्वास निर्माण होण्याची शक्यता आहे. हे वक्तव्य अशोभनीय, गैरजबाबदार आणि बदनामीकारक स्वरूपाचे आहे.
या तक्रारीवर बार काऊन्सिलने स्वतंत्र चौकशी करण्यासाठी त्रिसदस्यीय समिती नियुक्त केली होती. या समितीत अ‍ॅड. विवेकानंद घाटगे (अध्यक्ष), अ‍ॅड. संग्राम देसाई, अ‍ॅड. नेल्सन राजन हे सदस्य होते. समितीने सरोदे यांचे स्पष्टीकरण, कार्यक्रमातील वक्तव्ये आणि तक्रारदाराचे पुरावे तपासले. दीर्घ सुनावणीनंतर समितीने आपला अहवाल सादर केला.
समितीच्या अहवालावर आधारित निर्णय घेत अ‍ॅड. असीम सरोदे यांची वकिलीची सनद तीन महिन्यांसाठी रद्द करण्याचा आदेश देण्यात आला.
असीम सरोदेंनी काय वक्तव्य केले होते?
असीम सरोदे यांनी एका जाहीर कार्यक्रमात न्यायव्यवस्थेविषयी टिप्पणी केली होती. त्यांनी म्हटले होते की, न्यायव्यवस्था सरकारच्या दबावाखाली आहे व निकाल सरकारच्या बाजूने दिले जातात. तसेच त्यांनी राज्यपालांचा “फालतू” असा शब्द वापरून उल्लेख केला होता.
