मुंबई – १ लाखांची लाच घेताना एका दुय्यम अभियंत्याला लाचलुचपत प्रतिबंधक विभागाने रंगेहात पकडले. भुषण लक्ष्मण भुसाणे असे या दुय्यम अभियंत्याचे नाव असून तो सहाय्यक आयुक्त (बाजार) यांचे कार्यालय, बृहन्मुंबई महानगरपालिका, महात्मा ज्योतिबा फुले मार्केट (क्रॉफर्ड माक्रेट) येथे कार्यरत आहे.
याबाबत वृत्त असे आहे कि, मुंबईतील कुंधडिया सेवा संघ या संस्थेचे खजिनदारानी या संदर्भात तक्रार दिली होती. भुलेश्वर येथील मंडईतील मनपा शौचालयाच्या देखभालीची जबाबदारी त्यांच्याकडे आहे. मात्र, या शौचालयाची परवानगी रद्द करण्याकरिता महापालिकेच्या कार्यालयाकडून नोटीस देण्यात आली होती. नोटीसविरोधात तक्रारदाराने न्यायालयात अपील दाखल केले होते. न्यायालयाने या प्रकरणाची सुनावणी घेण्याचे आदेश महापालिकेला दिले होते.
तक्रारदार यांच्या संस्थेच्या नावे असलेला परवाना नुतनीकरण करण्यासाठी तक्रारदार यांना वर्क ऑर्डरची कॉपी देण्यासाठी भुषण भुसाणे यांनी ४ लाख रुपयांची मागणी केली. याबाबत तक्रारदाराने लाचलुचपत प्रतिबंधक विभागाला तक्रार दिली. तडजोडीअंती तक्रारदाराकडून ३ लाखांची लाच स्विकारण्याची तयारी भुसाणे यांनी दर्शविली. त्यानुसार सापळा रचून भुषण भुसाणे यांना १ लाखांची लाच घेताना एसीबीने रंगेहात पकडले.
